.: [ ღ ديوان الشاعر السنــافي ღ ] :. [الأرشيف]

خالد العقيبي

04-09-2008, 06:17 AM

بسم الله الرحمن الرحيم

.: [ ღ ديوان الشاعر السنــافي ღ ] :.

غـــــــــرامــــــيات السنــــــــافي

من عرفت الحب فيني ولّــعَــتْ حرب البسوس
وسْط قلبي حاربت الاشواق نيران الهجر

دافع الاشواق لجلك صار في قلبي امغَروس
خفت لامن طاح دمعي مَعْه شوقي ينتثر

قمت اخط الشعر واكتب من محاوير الهجوس
وكل بيت(ن) من قصيدي قمت احطه في سطر

والمعاني بالقصيده إلبست ثوب العروس
من بحور الوصف يرسي في موانيها الشطر

صاب قلبي رمش عينك دون سهم ودون قوس
طحت في حبك سقيم ومن غرامك احتضر

ترتعش الانفاس فيني وكل ماكان إمحَسوس
لا ابتسم ثغرك وفاحت منْه نفحات العطر

والدلال بمشيتك يثنيلك رقاب(ن) وروس
كل من شافك تنهّد : - لاحشى ماهو بشر

درس حبّك ياحبيبي غير عن كل الدروس
ادرس اشواق بعيوني لك واجاوب بالنظّر

لامشيت وشفت طيفك خايف اني له ادوس
وان جرحته طيفك ادعي:- علّه براسي كسر

صرت لي شي(ن) ثمين(ن) في دفا صدري امحَروس
وصرت لك بأهداب عينك مزنة(ن) ترقب مطر

ياعسى من هو جمعنا يبعد ضعاف النفوس
عن هوانا مثل بعد الارض عن سطح القمر
:::::::::::::::
::::::::
::::::
::::
:::

الـــ هـــجر

السموحه والعذر منّك
لي لفاني منك يكفيني
ببعده دربي انا عنّك
وبدمله جرح(ن) نشا فيني
يوم كنت الود معطنّك
والمحبه وصادق سنيني
وكنت عندي حيل مغلنّك
من غلاك الشوق يحويني
بالجمال اللي مغطنّك
من وطا الاجدام للعيني
ومن سواد الليل كاسنّك
جيد ظافي فوق ردفيني
والعذارى مايساونّك
كامل(ن) بالحسن والزيني
كيف تجفي قلب هاونّك
وش عقب فرقاك يشفيني ؟
من عن الخلاّن سالنّك ؟
ومن بعد الاشواق يرثيني ؟
لا أبد لا يدور في ظنّك
تنهمر الادماع من عيني
خذ حروف الشعر يرونّك
دام بالهجران تجزيني
ببتعد دام الغدر فنّك
ولا ابي قلبك يخاويني
علّهن الايام يرمنّك
مثل ما قررت ترميني
ياعساهن زود يعمنّك
وتنحرم من شوفها العيني
وكل فرح وخير مجفنّك
وكل شي ف دنيتك شيني
والليالي السود يلفنّك
ومن ظلام الليل تنخيني
لين تصرخ : بس راجنّك !
روف بي يالخل واعفيني
وابعتد واصد انا عنّك
ذي جزاته من يجافيني
:::::::::::::
:::::::::::::
:::::::::::::
:::::::::::::

......[ســر الجــاذبيّه]......

وسـْـط ليل(ن) بانت نجومه عِليّه
به ظلام(ن) حالك وجوّ (ن) مهيبي
بات قلبي يشكي هموم(ن) خفيّه
والدمع همّال من عيني صبيبي
دمعة(ن)طاحت على خدّي نديّه
و ادعت فوادي من فراقه عطيبي
أشهد ان الحب هو اكبر بليّه
واشهد انّه غلطتي وهو كلّ عيبي
كان اقسى من صخر قاسي عَليّه
يوم صد وصار عن عيني يغيبي
مـ(افتكر) في روح من بعده شقيّه
ولا فطر قلبه على كثر النحيبي
في بعاده قرّبه سيف المنيّه
ماهقيت الموت للعاشق قريبي
والبَخَت من يوم ماشينا البْريّه
مرة(ن) صايب ومرّات(ن) يخيبي
خاب حظي والحزن مدفون فيــّه
وسْط يوفي بات حرّاق(ن) لهيبي
افترقنا بعد ماكنّــــا سويّـــــه
بعد ماكان الهوى يشفي الصويبي
و امس جاني حامل(ن) بيده هديّه
قال ودّي اعتذر لك ياحبيبي
قلت له : ياشين وعيونك قويــّه
ابتعد ماعاد لي منّك نصيبي
ماعرفت تصون سر الجــاذبيــّه
ولا عرفت تكون لجروحي طبيبي

::::::::::::::
::::::::::::::
::::::::::::::
::::::::::::::
::::::::::::::

وين الحبــيــب

وين الحبيب اللي خيالي له يزور
ولي شفت طيفه تحتويني صفاته
وين الذي كان بنظر عيني النور
وله كنت اغلى حب ساكن حياته
ساعة يجيني كان يغمرني سرور
والوقت في قربه تبادت حلاته
ماهو على هجر المحابيب مجبور
ياكيف يترك خل عارف غلاته
روحي وعيني لا دعاهم له حضور
والقلب له يضمى لشوفة مناته
واليوم جفّى وصابني منّه قصور
عنّي رحل وابكت عيوني قساته
كان الوصل في مدّة ايديه مقدور
بس انكتب لي عيش هم وشقاته
يالله عسى ذنبه من اليوم مغفور
قلبي انا ذا اليوم اعلن وفاته
لا متّ واضحت جثتي بين القبور
ولا صار خلّي ميّت(ن) بحسراته
ولي بات دمع الخل عالخد مدرور
والبسمه بموتي تناست شفاته
قولوله اني مت فالبعد محسور
لكن قلبي ماتناسى غناته
:::::::::::::::
:::::::::::::::
:::::::::::::::
:::::::::::::::
:::::::::::::::
:::::::::::::::

لوعــة الفرقى

ادفنو محبوبتي فوق (اليبل)
واتركو قلبي على الصخره كسير
واردمو قبر الحبيبه بالرّمل
قبل ما الفواد ياضيه السعير
قلب مايقوى الفراق ومــ(احتمل)
مايطيق العيش من دون النظير
وان سريتو والقمر توّه كمل
اتركوني وسط صحراكم سهير
واتركولي زاد يومين وجمل
ما اظن العمر من بعده كثير
ضاع شوقي واحتمالي والامل
صار حالي من بعد موته خطير
اسعفوني ياعرب وش هو العمل
بين روحي والقبر قلّ المسير
بالليالي السود دمعي قد همل
يلعي الفرقى من هموم وحسير
جــرّح خدودي الى منّه نزل
وانتحب موقي يلين امسى ضرير
والصبر حدّه من فراقه وصل
مالقيت اللي انوبه واستشير
صار حالي مثل ما عود النخل
جفّت اوراقه على فرش الحصير
كنت اظن احزان قلبي بالسهّل
تبعد وهمّي من فراقه صغير
ماهقيت مفارقه واللي حصل
شي ماطيقه على فوادي كبيــر

:::::::::::::::
:::::::::::::::::
:::::::::::::::::
:::::::::::::::::
:::::::::::::::::
:::::::::::::::::

ملك الاحزان

انا من يوم فارقتك فوادي ماقوى الحرمان
جريح(ن) يرتجي وصلك وعن فرقاك يرجيني
طيوفك تسكن بقلبي حشى ماصابها نسيان
من اصبح تصبح بعيني ومن أمسي هي تمسيّني
تبات الناس مرتاحه وابات بغربتي سهران
ياغير سهيل وطيوفك صحيبه لي تخاويني
اشاكي سهيل بطيوفك وهو من شكوتي حيران
يــ(كيف) تصد عن قلبي وانا مرخص لك سنيني
عيوني تذرف بماها عليها ماقوى النكران
محال انكر وسيل الدمع تناهى فوق خدّيني
تعال وشوفني حاير وحيد(ن) ضايع وهيمان
ولا غير الحزن والهم وضيق البال يلفيني
انا من كثرة احزاني ينادوني ملك الاحزان
ملك والمملكه حزني وشعبي الهم لي فيني
ابرحل عن شقا الدنيا واضيع بوادي النسيان
واشيل الجرح في صدري عساه الوقت يشفيني
وابترك شي لو شفته تذكّر صاحبك يافلان
ابترك قلبي الميّت عساك بيوم ترثيني

::::::::::::::::::::::
:::::::::::::::::::::
:::::::::::::::::::::::
::::::::::::::::::::::::
::::::::::::::::::::::::
::::::::::::::::::::::::

ســـود الرمايــد

يشهد عليّ الرب ماني بناسيه
وتشهد حروف الشعر منّي وكايد
ياكيف بنسى وساعة يحل طاريه
يشعل بوسط الصدر جمر الوقايد
القلب يلعي من جروح ب خوافيه
والعين عافت مِنْه نوم الوسايد
حتى القلم محتار يكتب قوافيه
ولاّ يوازي الشعر لاجل الرغايد
تصلا خفوقي نار شوق وتواليه
يوم(ن) بعد يوم(ن) جروحي تزايد
وان غاب عن عيني دقيقه تناديه
وتعد له الاشواق فوق العدايد
ياكيف قلبي يصد عنْه ويجافيه
وعن عوق روحي لو رميته يحايد
وين اللذي بيثيب فالحب غاليه
ويجير قلبي وسط مرّ الشدايد
بندب لهم مرسال واخط انا فيه
شوقي ولهفة قلب منّي مدايد
لا من طريت الحب ذا الخل أعنيه
اللي غرامه فوق صدري قلايد
تفداه روحي وين حلّت مواطيه
لو هو وطى قلبي ب سود الرّمايد
:::::::::::::::::::::
:::::::::::::::::::
::::::::::::::::
::::::::::::
:::::::::
::::
:

اهداء ل(ولــد البــدو)

لامن كتبت الشعر في وصف خلاّن
سهّلت صعبات القوافي لحالي
الا انت وصفك لا طرالي بالاوزان
شفت الشعر ينصاغ لاجل الغوالي
فيض المشاعر صاير اليوم طوفان
جارف بسيله كل اول وتالي
لاجلك حروف الشعر تورد بالاطنان
ولاّ لغيرك ما تفتّح مجالي
لك بوزن الاشعار وأصف قيفان
واسترسل بوصفي صعيبات المنالي
الشعر لاجلك ينسكب وسط فنجان
تسكبه لك بالوصف روس الدلالي
اسوق لك الاشعار يا عالي الشان
ياساس عزّ المجد يا راس مالي
الودّ ودّي اكتب اليوم ديوان
وأوصل جنوب الشعر واغزو الشمالي
لكنّ مالي فالشعر حكم سلطان
ولاّ حكمته لك يجرّ الطوالي
ماهي توفّيك القصايد والالحان
ولا اظن وصفك تقترب له محالي
ان جيت اناجي بالشّعر بوصف انسان
مالي على وصف النجوم العوالي
الياه وسهيل وتواليه يافلان
حتّى الشفق لا بان حزّت زوالي
تاخذ لك من الوصف في كل تبيان
لك تعتزي الاوصاف عدّ الرمالي
ان قلت لك شــاهين ماني بغلطان
وان قلت حرّ(ن) جروديّ(ن) طرالي
وان قلت طير الباز جيتك بنقصان
ياتبع جير(ن) مرتقي فالمعالي
احترت بك للوصف وامسيت حيران
هو خانني التعبير ؟ ولاّ مقالي ؟
يامن بشوفك يرتوي قلب ضميان
امد لك بالشوق خط الوصالي
ولــد البدو لاهان طاريك لاهان
يالله عساك ادّوم فالقلب غالي
يارب تجلي الهم عنّه والاحزان
وتبقيه في راحات و أرفى الظلالي
امطرت لك بالشعر قولي بالامزان
ومنْك السموحه قبل ما اشد الرحالي

::::::::::::::::::
::::::::::::::::
:::::::::::::::
::::::::::::::
:::::::::::
::::::::::

فــــخر الرجـــــــال

الشمس غابت بالسما والليل قارب بالسّواد
والباقي بنور الشفق يلعب على قوس الاصيل
وان بانت نجوم الفضا ماغضّت عيون السّهاد
عيوننا تفدا الوطن لو بالرّشا دمّ(ن) يسيل
حنّا رجال وطبعنا لو تعرفه طبع العناد
ينهد حيل خصومنا لاصارت الرايه تميل
الفرد منّا لو عزَم يسوا من عزومه بلاد
تهتز الارض بخطوته وصعب الطرايق له تحيل
من يوم صغر كفوفنا حتّى على فرش المهاد
خذنا طباع المرجله والصبر والبال الطويل
نصبر على مرّ الصعاب وما تثنيّنا الشداد
مرّ الشدايد لو بطا نثنيه ونردّه قتيل
حنّا زرعنا المرجله وكان الفخر اكبر حصاد
رعودنا فوق السما بانت تخيل وتستخيل
حنّا لنا حرق الصعب وانتو لكم باقي الرّماد
يامرخصين قلوبكم والمجد بيديكم هزيل
ادق بطروق الفخر واثبّت طنوب الوتاد
و آهب لو شفت السقم وانت ولو صاحي عليل
والعزوه بقوم(ن) غدو لبلادهم عدّ وعتاد
وان كنت ساري بالشكوك شيوخنا اكبر دليل
شيوخنا فخر العرب للدار هم خير العماد
شوفتهم تزيح الكدر والهم من صدرك تشيل
نبع الكرم لا من لفاه الضيف اكرم به وجاد
لو هو يموت من الضما يسقيه عذب السلسبيل
والله رجال وفردنا يسواله لحاله بلاد
تهتز الارض بخطوته وغصب(ن) على الصعبه تحيل

::::::::::::::::
::::::::::::::::
::::::::::::::::
::::::::::::::::
::::::::::::::::

العيــد الوطني

سلام الله على داري عروس(ن) زينّت الاوطان
سلام العز لج مني بقلبي الشوق لج سادي
خليص الحب لج يسري بمجرى الدم والشريان
ولج بالروح منزالج وقدرج ماهو بعادي
فرحنا بعيدج العايد ,,,فرحنا فرحة العرسان
وغنّى الطير باغصانه طربنا صوته الشادي
عروس(ن) يا اماراتي لبستي بالفرح فستان
وفوقه طرحة العزّه وتاج الفخر لج بادي
شيوخج للعرب نوماس جداهم صارت العربان
تخط من الفرح لاجلج بيوت الشعر وتنادي
تغّنو في عرب زايد وصاغو لاجلهم الاوزان
عجز عن وصفج الشاعر غدى بالشعر متخادي
اذا جيت اوصف بشعري بديت بدار بو سلطان
عسا الله يحفظ دياره من الحسّاد والعادي
رحلت بوصفيه للعين ديار النخوه الجزلان
بدار الزين لي مربى ولي امجاد اجدادي
وقفت بشعريه حاير اطالع دار بو حمدان
دبي الشامخه عندي غلاها حيل متبادي
وبديار الثقافه حاكم(ن) راقي رفيع الشان
حكيم(ن) فاهم(ن) عارف سلبني طبعه الهادي
سلامي للنعيمي القرم من طيبه غدت عيمان
بحلاها وردة(ن) حمرا نفحني عطرها الكادي
وصلت لدار المعلاّ من دروب السفر تعبان
وحزّت شفتها بعيني تجلّى هالتعب غادي
وقفت اناظر الشاطي بدار(ن) لي سحرها بان
حكمها الشرقي ورسّخ بحكمه خير الاعمادي
ونهيت الرحله بدار(ن) جميله تسحر الاعيان
اذا قالو عرب جلفار عطاهم بالكرم زادي
امارات الوفا ارضي عربها كلهم فرسان
وكلّ(ن) بالفخر يصرخ: احبج موت يابلادي

::::::::::::::::::::::::
::::::::::::::::::
::::::::::::::
:::::::::::
:::::::::
:::::::
:::::::
::::

رثــاء لابونا زايد (الله يرحمه )

لقيت الحزن بديار العرب عمّر
ولا ادري وش مسبب حزنهم يافلان
وقمت اسأل عوالي الشان واتخبّر
عن اللي مدعي شعور العرب فاحزان
من عيونه لقيت الدمع يتحدر
وبلسانه كسر صمته عن الكتمان
عرفت اليوم انه (2 نوفمبر)
يصادف يوم غادر سيّد العربان
وشعبه من ثلاث سنين يتصبّر
على فقد الخليفه القايد الربّان
وكل شعور انس وفرح(ن) تبخّر
رحل زايد,,,رحل وادعى القلب عطبان
رحل من كان في ليل الدجى منور
سراجه شمس زاحت ظلمه الازمان
رحل وادعى فوادي حيل متأثر
واحزانه بصدري كنها طوفان
ونار الهم في صدري بدت تكبر
وتعلن حربها باليوف والعدوان
احس ان الزمن عقبه غدا مغبر
وخلق الله بداره كنّهم عميان
وغصن النبته الخضرا غدا أصفر
وطيره هاجر وعزّل عن الاغصان
وعود النخله الراوي بدا مقفر
بعد ماكان من خير وعطا رويان
وفرح الدار بوفاته رحل مسفر
غدت الاحزان بدياري لها عنوان
احيده كان للمحتاي به يكثر
عطايا ماتوفّيها ثقل الاوزان
يزيح الهم عن عينن بها ينظر
ومن يلقاه في ظيمه لفاه وعان
كريم(ن) عالي(ن) قدره ولا يصغر
ولا يرضى لشعبه ظلمن وبهتان
فلاحي من قروم وأصل متحدر
من اوصافه تعلّى للفخر تيجان
دياره بالوفا والخير له تشكر
بحكمه ارتقت داره عن الاوطان
يجوز الوصف للإنسان به يذكر
تعدى وصف زايد عن وصف الانسان
علومه مالها من واصف ومخبر
تخطت كل وصف وعانقت الامزان
ولكن للأسف ب (2 نوفمبر )
كتب ربّي رحيله وابتدت الاحزان
عسى الله يلهم السلوان ويصبّر
شعب زايد ويتوثق بهم الايمان
رحمك الله عدد ماهلل وكبّر
وعدد ماهلّت الدمعه من الاعيان
لك الفردوس يازايد بها تظفر
عسى قبرك حديقه من رياض جنان

::::::::::::::::::::::
::::::::::::::::::
::::::::::::::
::::::::::::
::::::::
::::::
:::
:

ياوليــفي

ياوليفي زاد بي عوقي
وماهنا لعيوني النوم
منك ياللي مالك(ن)شوقي
ولك بقلبي بيت مرسوم
يامليك الحسن والذوقي
روف بي عالهجر ماروم
الدمع بي غرّق الموقي
مااهتنا بشوفتك محروم
يحتويك الدم بعروقي
ومابخافي الصدر مضموم
شوف خلي لعيني يروقي
وعن خفوقي يجلي هموم
لي بطرفه سمّه يسوقي
من نظَرته بت محموم
والشعر ع المتن مفروقي
به سواد الليل معتوم
والخصر عالردف ملبوقي
عود موز(ن) وسط القروم
والغدير لعطره يتوقي
ومن عبيره ورد وخزوم
ماخلق شرواه مخلوقي,
شمس خده تخفي غيوم
من ملك ماتحتي وفوقي
يعل ربي يحفظه دووم
::::::::::::::::::::::::
::::::::::::::::::::
::::::::::::::
::::::::
:::::
:::
::
:

عفــت جــرحي

عفت جرحي وعفت المداوي
وعفت عيش العمر تعذيب
من حبيب(ن) يفتن وغاوي
من عيونه سهمه يصيب
وان تبسّم ثغره الضاوي
به يضوّي شمس المغيب
ماهقيته عالهجر ناوي
ولا هقيته عنّي يغيب
قلبي اللي مغرم وهاوي
من بعاده صابه الشيب
والدمع مسكوب(ن) وراوي
ماافتكر ف اللوم والعيب
عالهجر والصد مب قاوي
من لعوق القلب بيثيب
خذ نصيحة علم يالهاوي
لايغرك حسنن وطيب
في غرامك كون متساوي
وحط قلبك في دفا الجيب
لاتشّيد صرح متهاوي
فيه ظنّك صدق بيخيب
من عشم بك انك تخاوي
ولعيونه شوفك يطيب
ان حضنك وبت له لاوي
خذ بحذرك منه والريب
وان طرالك حب لاتاوي
قول له محجوز القليب
الغشيم الصقر له شاوي
ولا يخاوي صيده الذيب

:::::::::::::::::::::
:::::::::::::::::
::::::::::::::
:::::::::::
:::::::::
:::::::
:::::
:::
::
:

بطــاقة ســالك

لاتضيق وتكسر الخاطر
ولاتخلي الهم في بالك
الشعر مب لعبة الشاطر
الشعر من قاله الهالك
من يسمي عمره الشاعر
غارقن في ليله الحالك
كن عنده يومنا باكر
وكن قوله مابيصفالك
يفتكر شعره مثل ساحر
من حنيشه يفرز حبالك
لو قصيده بالوصف عامر
لو بشعره ينقلب حالك
لويقضي ليلته ساهر
لو قصيده صدق يحلالك
لايغرك قول متظاهر
يسرق اقواله من المالك
ومن بشعره قام يتفاخر
كن حط لموتره (ســالك)